Photo by Ambala/ 01062013 Ang pang-rehiyunal na grupong Alyansa ng mga Magbubukid sa Gitnang Luson (Amgl) at Alyansa ng Manggagawang Bukid sa Asyenda Luisita (Ambala) ay mariing kinundena ang pang-aagaw ng lupa, pagpapalayas at walang humpay na harasment sa mga manggagawang bukid sa Hacienda Luisita ng pamilyang Cojuangco-Aquino, sa pamamagitan ng kumpanya nitong Tarlac Dev’t. Corp. (Tadeco), partikular sa brgy. Balete at Cutcut sa Tarlac city. Ayon sa mga grupo, mula pa Setyembre ng nakaraang taon nagsimula ang pang-aagaw ng lupa ng Tadeco hanggang nakaraang Disyembre, na nagbunga ng paglabag sa karapatang pantao ng mga mahihirap na manggagawang bukid. Dagdag pa, nanindigan ang mga grupo na ang planong ito ay akma sa programang W-Growth Corridor at Public-Private Partnership (PPP) ng gubyernong Benigno Simeon “Noynoy” Aquino (BS Aquino).
Ngayong araw, nagprotesta ang mga manggagawang bukid sa pamamagitan ng paglalagay ng mga scarecrow (panakot sa ibon) sa mga lupang inagaw ng Tadeco sa brgy. Cutcut kasunod ng paglulunsad ng press conference ng mga grupo. Ang aksyong ito ay simbolo ng pagtutol sa mga hakbang ng pamilyang Cojuangco-Aquino at paninindigan ng paglaban ng mga manggagawang bukid sa pamumuno ng Ambala.
“Si BS Aquino at kanyang pamilyang Cojuangco-Aquino ay nagkukumahog palayasin ang mga manggagawang bukid sa Hacienda Luisita. Ang planong kumbersyon ay matagal nang pinapangarap ng pamilyang ito para magkamal ng limpak-limpak na kita mula sa lokal at dayuhang mamumuhunan. Kailanma’y hindi makukuntento ang pamilyang ito, kahit na ilang dekada nilang pinagsamantalahan ang lakas-paggawa ng mga manggagawang bukid at pinagkakitaan ang asyenda,” ayon kay Joseph Canlas, Tagapangulo ng Amgl.
Ayon sa Ambala at Amgl, ang pagkumbert sa Hacienda Luisita bilang isang regional economic zone ay nakapakete sa W-Growth Corridor ng PPP ni Aquino. Dugtungan ito malawakang kumbersyon at pagpapalayas sa libu-libong magsasaka sa ibang probinsya para bigyang daan ang mga makaisang panig na proyekto. Ang kanlurang bahagi ng Gitnang Luson ay target na idebelop bilang “tourism corridor” na sumasaklaw sa Sta. Cruz - Masinloc, Zambales patungong Subic Bay Metropolitan Authority (SBMA). Ang gitnang bahagi ng rehiyon na sumasakop sa mga probinsya ng Tarlac, Pampanga at Bulacan ay idedebelop bilang “industrial heartland”. Ibinabandera naman bilang “agricultural areas at agro-forestry” ang ilang bahagi ng probinsya ng Bulacan at buong Nueva Ecija. Ang bahagi naman ng Zambales patungong Aurora bilang ear part ng W Growth Corridor ay kumbinasyon ng eko-turismo at para daw sa “agricultural development”.
“Sa kasalukuyan, galit at dismayado ang manggagawang bukid sa gubyernong BS Aquino. Kasunod ng mala-peryang pamamahagi ng cetificate of land ownership award (cloa), isinunod ng pamilyang Cojuangco-Aquino ang pag-angkin sa 104 ektaryang sakahan at gulayan sa brgy. Cutcut at 268 ekt. lupain sa brgy. Balete. Taong 2005 pa sinimulang pakinabangan ng mahigit 150 manggagawang bukid at kanilang pamilya ang lupaing ito bunga ng kampanyang bungkalan ng Ambala,” dagdag ni Canlas.
Ayon sa Ambala, mahigit 100 ekt.palayan at gulayan sa brgy. Balete ang sinira ng Tadeco sa pamamagitan ng bulldozer noong Disyembre 12 at 21 ng nakaraang taon. Kinasuhan ang 26 manggagawang bukid ng unlawful detainer at iligal na inaresto ang 5 manggagawang bukid na humarang sa pagsira at nagtanggol sa mga pananim na kanilang kabuhayan. Kaugnay nito, pinadalhan ang mga manggagawang bukid ng notice para kagyat na umalis sa kanilang lupain sa loob ng 15 araw. Ang kaganapang ito ay hindi kaiba sa brgy. Cutcut, kung saan, apektado ang 104 manggagawang bukid at kanilang pamilya na aktwal na nagbubungkal sa inaangking lupain ng TADECO.
Ayon kay Florida Sibayan, Tagapangulo ng Ambala, “wala kaming ibang hangarin kundi mabuhay ng mapayapa at tahimik sa asyenda. Sa ngayon, dahil binabantayan ng security guards at mga elemento ng Tarlac City at provincial police ang aming sakahan, kinikitil nila ang aming akses at karapatang bungkalin ang mga ito nang may makain ang aming mga pamilya.”
“Malinaw sa amin na ang inaangkin na lupain ng Tadeco ay dapat ipamahagi sa mga magsasaka dahil bahagi ito ng desisyon ng korte suprema noong Abril 2013, samantalang wala silang maipakitang anumang dokumento o court order bilang batayan sa kanilang pag-bulldozer at pagbakod kung kaya ito ay tuwirang iligal,” dagdag ni Sibayan.
Sa nakuha ng Ambala na Land Use Plan ng Hacienda Luisita noong 1993 na dinisensyo ng pribadong kumpanya, pawang kumbersyon tungong komersyal, industriyal at residensyal na proyekto ang plano sa libu-libong ektaryang lupa. Buburahin nito sa mapa ng hasyenda ang kabukiran at ang mga planong residensyal ay hindi naman para sa kapakinabangan ng mga manggagawang bukid. Nakapaloob dito ang techno park, commercial business district, golf course at eko-turistang erya. Samakatuwid, isinusulong lamang ng pamilyang Cojuangco-Aquino ang interes nito upang kumita sa malawak na lupa at malinaw na plano nitong palayasin ang mga manggagawang bukid at mamamayan ng Hacienda Luisita.
Sa kasalukuyan, tuluy-tuloy ang paglaban ng Ambala sa panlilinlang, pang-aagaw ng lupa at pagpapalayas ng Tadeco at pamilyang Cojuangco-Aquino. Nanindigan itong maglulunsad ng malalaking protesta kasama ang iba pang mga samahan at organisasyon ng probinsya at rehiyon.
“Walang nagbago sa aktitud ng pamilyang Cojuangco-Aquino, bagkus sinamantala lamang nito ang pagkapangulo ni BS Aquino, ginamit ang makinarya at pwersa ng gubyerno. Ito ay lantarang ka-trayduran sa bayan at kabulukan sa lipunang dapat nang wasakin ng mamamayan. Alam ng buong bansa ang kainutilan ni Aquino at pagpabor sa malalaking lokal at dayuhang negosyante, panginoong maylupa at pagpapakatuta sa imperyalismong US. Hindi na dapat tiisin ng mamamayan ng rehiyon ang susunod na tatlong taong panguluhan ni BS Aquino, bagkus, simulan na ang malawakang paninindigan at panawagang palitan siya,” pagtatapos ni Canlas. #
RSS Feed
