Milan-OFW Kapit Bisig
18 March, 2012
Mga kapatid sa pakikibaka,
Nakakarating sa amin ang inyong buhay at kamatayan pakikibaka para igiit ang inyong karapatan sa lupa. Mula sa unibersal na katotohanan, sadyang kailangan ng tao ang lupa sapagkat dito siya nabubuhay di tulad ng isda na nabubuhay sa tubig o dili kaya ang mga ibon na nakakalipad at malayang nakakadapo sa mga punong kahoy para mabuhay. Kung ito ma’y ikonsulta sa Bibliya, matutunghayan natin na kasama ito sa nilikha para mabuhay ang tao. Samakatuwid, malinaw na makatarungan lamang at maka-bibliya ang inyong mga ipinaglalaban at layunin di lamang sa ating nakagisnang panahon sa halip, para sa ating mga susunod na henerasyon.
Mula naman sa amin hanay bilang mga migrante, malalim na naiintidihan namin ang inyong mga ipinaglalaban at paninindigan sa katotohanan karamihan sa amin ay galing sa pamilyang magsasaka. Naiintindihan din namin na ang inyong mga pakikibaka diyan sa Hacienda Luisita ay sinasalamin o sinasaklaw ang pambansang pakikibaka sa lupa sa pangkalahatan. At bilang isang organisadong migranteng samahan, kasama ninyo kami sa inyong panawagan na magkaroon ng tunay na reporma sa agraryo at mga batayang pambanasang industriyalisasyon sa ating Inang bayan.
Isa sa mga paraan ng inyong pakikibaka ay ang pagtangan ng gulok o itak bilang depensa sa inyong hanay at sa kabilang banda, paggigiit ng inyong mga karapatan. Sa parteng ito, di lamang sinisimbolo nito ang ating mga ninuno gamit ang itak na lumaban sa pananakop ng mga dayuhan sa halip, ito ang konkretong indikasyon nagmumula sa kaibuturan ng inyong mga damdamin na ipaglaban anuman ang nararapat para sa inyo. Dahil dito saludo kami sa inyo at karapat-dapat din maihanay kayo sa mga lehitimong tagapagmana sa kabayanihan ng ating mga ninuno.
Sa panig ng umiiral na naghaharing sistema. Malinaw pa sa sikat ng araw na ang pinapaboran nito ay iilan pamilya sa lipunang Pilipino. Isa na rito ay mismong pamilya ng kasalukuyang pangulo ng bansa kasama na rito ang mga Cojuanco. Siyempre pa huwag na lang natin kalimutan ang kanilang mga alipores. Lahat ng inyong mga lehitimong kahilingan diyan sa Hacienda Luisita, pasismo ng estado o private armies ang kasagutan ni pangulong Pinoy tulad ng naganap noong nakaraan Nob. 2004 at ngayo’y nagbabanta na maulit sa malapit na hinaharap. Ito ang katangian ng umiiral na sistemang lipunang Pilipino bilang mala-kolonyal na nasa dominyon ng mga dayuhan sa pangunguna ng amerikano at mala-pyudal na kaayusan pang-ekonomiko na kontrolado ng mga panginoong maylupa kasabwat ang malalaking burgesya komprador.
Kabilang kayo sa malawak na masang inaapi bilang uring magsasaka gayun din ang uring manggagawa at kami rin bilang sektor ng manggagawang Pilipino sa ibayong dagat. Kasama rin dito ang sektor ng kababaihan at kabataan, mga pambansang minorya at mga kapatid na muslim. At sa antas ng pambansang paninindigan, iisa ang ating minimithi; ang magkaroon ng isang malaya, demokratiko, makatarungan at maunlad na lipunang Pilipino.
IBAGSAK ANG PASISMO AT TERORISMO NG ESTADO!
PALAYASIN ANG MILITAR SA LOOB AT LABAS NG HACIENDA LUISITA!
MABUHAY ANG BUHAY AT KAMATAYAN PAKIKIBAKA NG MAGSASAKA AT KANILANG PAMILYA SA HACIENDA LUISITA!
MABUHAY ANG KILUSANG MAGSASAKA SA BANSA!