PAHAYAG NG
PAGSUPORTA SA KILUSANG MASA NG KABABAIHAN
SA PANDAIGDIGANG ARAW NG KABABAIHAN
Mainit na pagbati ang ipinapaabot ng Alyansa ng mga Magbubukid sa Gitnang Luson (AMGL) sa kilusang masa ng kababaihan sa pangunguna ng Amihan at Gabriela!
Napatunayan ng mayamang karanasan ng AMGL ng pakikibaka para sa lupa ang mahalagang papel ng kababaihan. Marami ring pagkakataon na sila ang nasa unahan upang harapin ang mga pasistang pwersa ng mga malalaking panginoong maylupa, burgesya kumprador, dayuhang imperyalista at kontra-mamamayang estado. Malaki ang kanilang bahagi sa gawaing pagsasaka sa kanayunan at sa pakikibaka para ipagtanggol ito.
Isang halimbawa ang pakikibaka ng mga manggagawang bukid sa Hacienda Luisita. Sa kasagsagan ng welga noong Nobyembre 2004, mahalaga ang naging papel ng kababaihang magbubukid upang imintina at ipagtanggol ang piketlayn. May araw din na nagtapatan ang kababaihang magbubukid at ang kababaihang pasistang pwersang PNP noong subukan ng huli na i-disperse ang welga. Nanaig ang mga kababaihang magbubukid dahil sa kanilang matibay na paninindigan at walang takot na pagharap sa pwersa ng estado.
Nitong Pebrero 20, nang subukan ng mga Cojuangco at RCBC na maglagay ng bakod sa lupang binubungkal sa kasalukuyan sa Brgy. Balete, mismong mga kababaihang manggagawang bukid ang nagtanggal ng bakod na yero at ang mga security guards ay nagtakbuhan sa takot dahil sila ay mga dalang itak at iba pang gamit sa pagsasaka. Ang mga kalalakihan naman ang nagbuhat ng mga outpost upang wala nang mabasehan ang mga security guards. Ang mga yerong binuhat ng mga kababaihan ay ngayo’y ginagamit sa kampuhan ng bungkalan.
Sa maraming probinsya, napakaraming kababaihan ang tumatayong lider at aktibistang magbubukid na siyang nagtatanggol sa kanilang karapatan sa lupa. Tunay na kahanga-hanga ang kababaihang magbubukid dahil sa napakarami nilang inaasikaso, ang pangangalaga sa pamilya, pagsasaka at pakikibaka para sa Tunay na Reporma sa Lupa. Sa rehiyon, nasa antas din ng paghahandang mabuo ang pangrehiyonal na organisasyon ng Amihan upang tuluy-tuloy na maitambol ang napakaraming isyung nakaapekto sa masang magsasaka.
Kung kaya, marapat lamang na bigyang pugay ang masang kababaihan dahil sila ay lumilikha ng kasaysayan, nakikibaka para sa ating karapatan at nagsusulong ng pundamental na reporma sa lipunan. Ang AMGL ay kaisa sa pagpapalaya ng masang kababaihan at ang kababaihan ay kasama sa pagpapalaya ng uring magbubukid!
Mabuhay ang kilusang masa ng kababaihan!
Mabuhay ang Amihan at Gabriela!
Mabuhay ang nakikibakang mamamayan sa rehiyon at sa bansa!
Ipaglaban ang Tunay na Reporma sa Lupa!
RSS Feed